Народная Воля

«Абярог» ад Алеся Клышкі

3.04.2008   №49-50   -   Дар'я ГАРОШКА

Футбаліст, даследчык, творца, галава сямейства і адданы вернік. Многія пісьменнікі, прачытаўшы гэтае апісанне, пазнаюць у ім свайго паплечніка — Алеся Клышку.

Нарадзіўся Алесь Клышка ў шматдзетнай сям'і, таму і працаваць пайшоў рана — з 16 гадоў. Пасля заканчэння вячэрняй школы паступіў у Беларускі політэхнічны інстытут. Працаваў на МАЗе, гуляў у футбол за каманду "Тарпеда". Пасля пайшоў на працу ў БПІ, абараніў дысертацыю, стаў кандыдатам тэхнічных навук. Ад пачатку 2007 года працуе ў НДІ прыкладных фізічных праблем Белдзяржуніверсітэта. Мае каля сотні друкаваных навуковых прац і вынаходніцтваў...

"Фізікі і лірыкі" — традыцыйна падзяляюць у жыцці навукоўцаў і творцаў. Алесь Клышка перайначыў гэтую традыцыю, гарманічна спалучыўшы строгія законы навукі і мастацкі хаос літаратуры. Больш таго, паэт даказаў: пачынаць ніколі не позна! Першая кніга творцы з'явілася ў 2002 годзе і мела назву "Ад каранёў да кроны". Потым было выданне, прысвечанае Мінску, — "Шчасце маё". Наступным стаў зборнік "Далёкае блізкае". Магчыма, гэтак праявіцца лірычнаму пачатку Алеся Клышкі дапамагла вера ў Бога, да якога творца прыйшоў ужо ў сталым узросце. Разам з верай жыццё яго ўзбагацілася роднай мовай. У духоўнай сферы паэт працуе гэтак жа актыўна, як і робіць усё ў сваім жыцці. З яго дапамогай былі зладкаваныя паломніцтвы да беларускіх святыняў, у верасні мінулага года адбыўся фестываль хрысціянскай паэзіі ў Сынковічах. Там была прэзентавана кніга "Шлях да Жыровічаў", напісаная ў сааўтарстве з інакам Мікалаем, вядомым яшчэ як паэт Зьніч (Алег Бембель). Другая сумесная іх кніга носіць назву "Жыровіцкія камяні". Выданні сталі неабходным унёскам у запаўненне вялікага прагалу тэалагічнай літаратуры на беларускай мове.

Але на гэтым неўтаймоўны паэт не збіраецца спыняцца — энергіі яму не займаць.

Падчас святкавання 60-гадовага юбілею адбылася прэзентацыя шостай кнігі Алеся Клышкі — "Абярог". Аснову кнігі склалі вершы, падрыхтаваныя ў мінулым годзе для чытання ў радыёперадачы "Начная Свабода": інтымная, патрыятычная, духоўная лірыка. Да таго ж у зборнік увайшло яшчэ некалькі вершаў і інтэрв'ю з паэтам.

"Раней у мяне было шмат вершаў па-руску, цяпер жа пішу толькі на роднай мове. Ёсць, праўда, адзін па-турэцку. У гэтым зборніку я сабраў і арганічна спалучыў лепшыя творы апошняга часу", — распавядае Алесь Клышка пра змест "Абярога". Назву кнігі ён тлумачыць так: "Для мяне абярог — гэта крыж, вера, малітва. Малітва за нашых памерлых і жывых, якія таксама моляцца за нас. Добраслаўленне. А калі чалавек добраслаўляе іншага, то гэта нясе ў сабе вялікую сілу". Паэтычны зборнік мае гукавое ўвасабленне ў аднайменным дыску "Абярог", куды ўвайшлі творы Клышкі і інака Мікалая. "Многім людзям бракуе часу чытаць, — кажа творца ў размове пра плытку. — Гукавы варыянт дазволіць ім пазнаёміцца з жаданымі творамі. У планах — выдаць у такой форме кнігі пра Жыровіцкі манастыр". Паэт не будуе далёкіх перспектыў. "Цяпер я разумею, якое імклівае жыццё, — гаворыць ён, — і імкнуся берагчы і атрымліваць асалоду ад кожнага яго дня".

Але людзі, што ведаюць Алеся Клышку, не сумняваюцца — без справы ён сядзець не будзе. "Ёсць літаратары, у клопатах якіх, у справах і думках якіх мяжа паміж бытам і творчасцю непраходная: "і зямлю паарэ, і вершы папіша". А ёсць і такія, што мяжы той і не бачаць, і не ўяўляюць. Быццё для іх — усёчасная сутворчасць, а тварэнне — штодзённае існаванне, — распавядае пра творцу ў прадмове да "Абярога" старшыня Саюза беларускіх пісьменнікаў Алесь Пашкевіч — Гэтаму сведчанне яго новая кніга, асноўнае крэда якой якраз яскрава і характарызуе згаданую цэльнасць і арганічнасць: берагчы тое, што чалавека робіць Чалавекам, верніка — узвышае да Вечнасці, жыхара Беларусі — да Беларуса. І ў які ўжо раз цвердзіць Біблейскае: напачатку было Слова".

А завяршыць матэрыял хацелася б пажаданнем Генадзя Бураўкіна, якое прагучала падчас прэзентацыі зборніка вершаў Алеся Клышкі:

I я жадаю Клышку:

Яшчэ паўсотні год!"

абмеркаваць (0)